12/08/2026
ريڤيو فندق تيوليب اسكندرية رويال
من ٦ الي ٨ اغسطس ٢٠٢٦
رقم الغرفة ١٣٠
من اكتر الفنادق اللي الواحد نزلها في اسكندرية
يعتبر من فنادق الخمس نجوم ولكن …
الفندق مطل علي البحر ( صف تاني ) علي كورنيش الاسكندرية سيدي جابر
مواجه لفندقي صانرايز اليكس اڤينيو و جولدن چويل ( صف اول )
وبيستخدم حاليا الشاطيء بتاع جولدن چويل ( الاتنين تابعين للجيش )
كان قبل كدا ليه شاطيء خاص مع تذاكر دخول لغير المقيمين
وماتتعشمش كتير في البحر خاصة الفترة دي من السيزون
الشاطيء شعبي جدا غير راقي
مافيش شيزلونجات كلها كراسي بلاستيك ومافيش اي اهتمام بالنضافة
والبحر نفسه لونه اخضر وفيه عشب ممكن تقرف تنزل فيه
لكن بالتأكيد هو شاطيء رملي ومافيهوش امواج
بس حاول تحجز غرفة ليها إطلالة علي البحر لان اهم ما يميزه هو الڤيو الساحر علي البحر
فيه شاتل باص بيتحرك كل ساعة من الفندق لحد الساعة ٦ بيوديك الشاطيء واخر موعد عودة الساعة ٦ ونص
بالنسبة لحمام السباحة هو واحد ومش كبير بالنسبة لأشغال الفندق
لكن ماشي حاله
العمق بتاعه ١٣٥ سم و ١٧٠ سم متصلين ببعض عشان اصحاب الأطوال القصيرة يمتنعون
وفيه جزء صغير ٦٠ سم للأطفال
الفوط بتاخدها من علي البول او البحر وبترجعها تاني من غير كروت
الاقامة بتبقي بالافطار فقط
ودا بيبقي في مطعم في الدور ال ١١
واخد ڤيو ساحر علي البحر لكن مش عارف ليه مش بينضفوا الازاز عشان تقدر تشوف البحر
الإفطار كان زحمة جدا مش بتلاقي مكان تقعد فيه بسهولة حتي بعد اما بيفتحوا extension خارج المطعم
الأصناف فيه كتير ومقبولة جدا
فيه عصائر تفاح وبرتقال وكركديه وفيه ركن مخبوزات
وفول وطعمية وبطاطس وجبن وبيض ومربي .. اللي هو الاستاندارد بجودة مقبولة بس ماتتوقعش التميز ومافيش اهتمام بسلطات او فواكه
فيه مطاعم متخصصة لو عايز تاكل غدا او عشا وطبعا اسعارها عالية
مطعم اسكندراني في الدور ال ١١ دا للأسماك
برضه نفس الڤيو الجميل والإزار المشبر
ماعندهوش اسماك عادية زي البوري والبلطي عشان يضمن انك تدفع كتير
ولازم تطلب طبق رئيسي عشان ماتفكرش تدخل تطلب شوربة وتمشي وتعمل ناصح
الأسماك كانت قاروص وموسي ووقار ودنيس غير طبعا الجمبري اللي بيصل سعر الكيلو عنده لالفين جنيه غير الضريبة ٢٦ ٪ بس للامانة الطعم حلو ومميز
فيه في الدور الارضي مطعم بعلبك متخصص لبناني ودا شيك جدا لكن الخلطة بتاعته صعبة جايز عشان الواحد مالوش في اللبناني
وكمان فيه مطعم بطة هانم للأكل الشرقي وديكوراته حلوة جدا واكله طعمه مميز زي البط والحمام والمحاشي والكفتة
في دور ال M اللي فوقيه مطعم ايطالي cucina بس البيتزا بتاعته مش افضل حاجة وان كان برضه شيك وهاديء
في نفس الدور فيه سينما كانت عارضة فيلم صقر وكناريا وقدامها فشار
وفيه قاعات أفراح وقاعات اجتماعات
الغرف نفسها سرايرها مريحة الحمام فيه بانيو صغير والأدوات الرئيسية فقط زي الشامبو والشاور چيل بدون اي رفاهيات اخري
التلفزيون بيه بعض قنوات متنوعة منها كام قناة باسم الفندق افلام وكارتون
فيه كاتل للمشروبات الساخنة وزجاجتين مياة صغيرين
وفيه ثلاجة ميني بار بس فاضية
