01/06/2026
Postkaart mat enger Vue op d'Ourbréck zu Veianen an dem Haus wou den Auteur Victor Hugo kuerz Zäit gelieft huet.
Eng éischte Kéier ass dokumentéiert, dass den Hugo am August 1862 zu Veianen war. Duerno war hien nees 1863 a 1865 kuerz zu Veianen an 1871, wéi hie vun der Belsch an den Exil geschéckt gouf, well en Leit vun der "Commune de Paris", déi sech géint d'franséisch Regierung rebelléiert hunn, ënnerstëtzt huet. Zu Veianen huet hie seng Heemecht fonnt an hei huet hien och en Deel vu sengem Gedichtband "L'Année terrible" geschriwwen.
Am lénke Gebai, wou een de Schrëftzuch "Bierhalle" erkennt, war den Hotel Koch (Kaufmann), wou dem Hugo säi "Gefolge" logéiert war. Haut fanne mir hei den Hotel Victor Hugo Vianden. Wéi d'Foto fir d'Postkaart gemaach gouf, huet en der Famill Kirch-Welbes gehéiert. Hannendrun war den Hôtel Ferber.
Den Hugo selwer huet 2 an en hallwe Mount am Haus vun der Famill Ensch-Scheidweiler (riets) gelieft, wou mir haut den Musée littéraire Victor-Hugo fannen, deen 1935 ageriicht gouf. 2002, fir den 200. Gebuertsdag vum Victor Hugo, gouf zu Veianen no 3 Joer Ëmbauaarbechten de renovéierte Musée littéraire Victor-Hugo nees fir de Public opgemaach.
Wéi een op der Foto gesäit, ass dat rietst Gebai nach ëmmer dat selwecht. Lénks an hannen an der Mëtt sinn d'Gebaier awer staark verännert resp. nei opgebaut ginn, dat Opgrond dem Réckzuch vun der däitscher Wehrmacht am September 1944, wéi si d'Bréck gesprengt hunn. D'Gebai lénks war ganz staark beschiedegt, esou dass et ofgerappt an nees nei opgebaut gouf.
A der Mëtt vun der Bréck steet iwwregens d'Statue vum Bommenzinnes (Hl. Nepomuk), dee sech ëm Hallefnuecht dräimol ëmdréint. Gitt mol eng Kéier kontrolléieren. 🙂
