13/08/2026
我成日覺得……
如果旅遊經驗唔算多，摩洛哥未必係一個最容易去嘅地方。
唔係因為摩洛哥特別難 plan，唔係單純因為語言問題，甚至唔係因為大家成日講嘅 scam。而係——摩洛哥係一個「落差感」可以好大嘅地方。
我覺得，一個比較有旅遊經驗嘅人，同第一次接觸呢種文化差異嘅人，最大分別唔係識唔識排行程，而係當遇到落差時，識唔識理解、消化同接受。
而唔係第一個反應就係：
「有冇搞錯？」
「點解可以咁？」
「原來摩洛哥咁差？」
最簡單嘅例子：慢。
摩洛哥人做嘢可以好慢，餐廳上菜慢，你趕時間，佢亦未必跟住你一齊急。
如果完全接受唔到，成程不停催，最後好難真正 enjoy 呢個地方。
有啲嘢係服務問題，當然應該改善；但有啲嘢，係生活節奏同文化差異。識得分辨兩者，我覺得係旅行其中一件幾重要嘅事。
又例如 Riad。
我成日覺得，去摩洛哥完全唔住 Riad，好似少咗摩洛哥嘅體驗。
因為 Riad 最吸引人嘅地方，從來唔係「酒店應該有啲乜」，而係你住嘅，本身就係摩洛哥嘅建築、歷史同工藝。
Zellige 馬賽克、木雕、石膏雕花……由牆身、門框、天花到地板，每一個角落都係手工藝。特別去到 Fes，有啲 Riad 本身就係幾百年歷史嘅大宅。
你住嘅唔只係一間房，某程度上係住入一段歷史入面。
如果你帶住現代酒店嗰套 expectation 入去：
「點解冇電視？」
「點解冇雪櫃？」
「點解間房冇張大書枱？」
「點解唔似五星級酒店？」
咁個落差一定可以好大。
Riad 本身就唔係酒店，亦唔應該用同一把尺去量度。
如果你需要嘅係設備齊全、標準化、新式嘅現代酒店，住酒店完全冇問題。
但如果選擇住 Riad，就應該理解自己選擇嘅，正正係另一種住宿體驗。
喺 social media，好多人將摩洛哥變成一個打卡天堂。
大家見到嘅係沙漠日落、Riad、精緻嘅 rooftop restaurant、超靚嘅馬賽克工藝……
無可否認，摩洛哥的確好靚，周圍都可以打卡。
但如果你純粹因為 Instagram 上面見到嘅摩洛哥而嚟，真正黎到之後，可能會發現——
真實嘅摩洛哥，同你想像中嗰個摩洛哥，可以係兩回事。
佢可以好靚，同時亦可以好亂。
可以好精緻，同時亦可以好粗糙。
可以有非常熱情嘅人，同時亦會遇到令人好煩嘅人。
可以有令人驚嘆嘅傳統工藝，同時亦有一套令人完全摸不着頭腦嘅官僚制度。
呢啲全部都係摩洛哥。
我有時帶團，都會同團友分享一啲自己喺摩洛哥生活遇到嘅事，例如同員工相處、做生意、處理文件，或者面對官僚制度時發生過嘅荒謬事情。
我分享呢啲唔係想講摩洛哥「差」，反而係因為我覺得，呢啲先係一個地方活生生嘅一面。
有時大家會話：
「吓？原來可以咁㗎？」
「點解會咁㗎？」
但我覺得旅行有趣嘅地方，正正就係呢度。
你可以選擇用香港、日本、歐洲嘅標準去 judge 每一件事；亦可以嘗試理解：
點解呢個地方會變成今日呢個樣？
點解有啲我覺得理所當然嘅事，喺另一個地方原來完全唔係理所當然？
接受文化差異，唔代表所有事情都要合理化，更加唔代表差嘅服務或者 scam 都要接受。
而係識得分辨——
咩係真正有問題，咩只係同我習慣嘅世界唔一樣。
所以如果有人問，去摩洛哥之前要做咩準備，我反而覺得除咗排行程、睇景點之外，仲有一樣好重要：
調整 expectation。
你要知道，去緊嘅係一個可能同你原本想像有好大差距嘅地方。
唔好用香港去比較，亦唔好用日本去比較。甚至唔好用 Instagram 入面嗰個摩洛哥去比較。
帶多少少好奇心、少少耐性，亦保留自己嘅判斷力。
你可能會開始明白，點解有人去完摩洛哥覺得：「一次就夠。」
但亦有人去完之後，會一次又一次返去。
最後，我想講：
摩洛哥已經唔係一個「乜都好平」嘅國家。
尤其係 Marrakech。
物價一路升，旅遊區更加明顯。所以唔好帶住「我去北非，俾少少錢應該已經住得好、食得好」嘅 expectation。
平嘅選擇當然仍然有，但如果你要求住宿有質素、餐廳環境靚、食材好、服務好，價錢其實可以非常接近歐洲，某啲熱門地方甚至一啲都唔平。
摩洛哥最值得體驗嘅，從來唔係「平」。
而係佢同你熟悉嘅世界，有幾唔一樣。
