11/03/2016
प्रसिद्ध धार्मिक एवं पर्यटकीय स्थल पञ्चासेको काखमा अवस्थित पर्वतको चित्रेमा आन्तरिक पर्यटकको आकर्षण वढ्दै गएको छ ।विगत ३ वर्षदेखि होमस्टे सेवा शुरु भएको चित्रेमा आन्तरिक तथा बाह्य पर्यटकहरुको आकर्षण बढेको हो ।
पर्यटकका लागि गन्तव्य स्थानको रुपमा विकास हुँदै गएको चित्रेमा यस वर्षमात्रै एक हजार पाँच सय भन्दा बढि आन्तरिक पर्यटकहरु भित्रिएका छन् । खासगरी पर्वत, स्याङ्जा र कास्कीको सिमानामा रहेको पञ्चासे क्षेत्रमा जडिबुटी तथा बन्यजन्तुको अध्ययन अनुसन्धान गर्नेहरु र विदाको समयमा शान्त तथा मनोरम ठाउँमा घुम्न मन पराउनेहरु चित्रेमा आउने गरेको चित्रे ग्रामीण पर्यटन होमस्टे विकास समितिका अध्यक्ष शुशिलादेवी गुरुङले बताईन् । उनका अनुसार यस वर्ष मात्रै एक हजार पाँच सय भन्दा बढि आन्तरिक पर्यटक र एक सय भन्दा बढि बाह्य पर्यटक गाउँमा भित्रिएका छन् ।
पर्यटकहरु अघिल्लो दिन चित्रेमा पुग्ने र होमस्टेमा वास बस्ने गर्दछन् र भालिपल्ट विहानै सुर्योदय र हिमश्रृङखलाको अवलोकन गर्नका लागि पञ्चासे पुग्ने गर्दछन् । दुई हजार पाँच सय १७ मिटरको उचाईमा रहेको पञ्चासेवाट पश्चिमाञ्चलका एकदर्जन भन्दा बढि जिल्ला सदरमुकामको अवलोकन, माछापुच्छ«े, अन्नपुर्ण, धौलागिरि लगायतका थुप्रै हिमश्रृङखलाहरु प्रत्यक्ष रुपमा देख्न सकिन्छ । गाउँमा आउने पर्यटकहरुलाई स्थानीय परिकारहरु खुवाउने गरीएको छ । स्थानीय स्तरमा उत्पादिन तरकारी, स्थानिय जातका पशुपुंक्षीको मासु, घरेलु मदिरा लगायतका खानेकुराहरु दिने गरिएको छ ।
खासगरी गुरुङहरुको बाहुल्यता रहेको हुनाले गाउँमा आउने पर्यटकहरुलाई स्थानिय रुपमा प्रचलित परम्परागत साँस्कृतिक कार्यक्रम, गीत तथा नृत्यहरु देखाउने गरीएको छ । ठुलो क्षेत्रफलमा फैलिएको पञ्चासे क्षेत्र पनि आन्तरिक तथा बाह्य पर्यटकका लागि गन्तव्यस्थल नै भएकाले पनि चित्रेमा वर्षेनी पर्यटकहरुको आकर्षमा बृद्धि हुँदै गएको स्थानीयवासीको भनाई छ । पछिल्लो समयमा पर्वतको चित्रे, आर्थर, शालिजा, बाँसखर्क, लेखफाँट, लुंखुदेउराली, भोक्सिङ लगायतका गाविसमा होमस्टे सुविधा सञ्चालन भएको छ ।
