05/08/2026
https://www.facebook.com/share/p/1EWG6Nk63n/
𝗨𝗡𝗦𝗔𝗢𝗡 𝗣𝗔𝗚𝗣𝗜𝗟𝗜 𝗦𝗔 𝗠𝗚𝗔 𝗕𝗘𝗡𝗘𝗣𝗜𝗦𝗬𝗔𝗥𝗬𝗢 𝗨𝗚 𝗨𝗡𝗦𝗔 𝗔𝗡𝗚 𝗣𝗔𝗣𝗘𝗟 𝗦𝗔 𝗠𝗚𝗔 𝗢𝗣𝗜𝗦𝗬𝗔𝗟𝗘𝗦 𝗦𝗔 𝗕𝗔𝗥𝗔𝗡𝗚𝗔𝗬?
Daghan ang nangutana nganong adunay mga pamilya nga naapil sa listahan sa mga makadawat sa 𝗨𝗣𝗟𝗜𝗙𝗧 𝗔𝗦𝗦𝗜𝗦𝗧𝗔𝗡𝗖𝗘 samtang adunay uban nga wala maapil. Tungod niini, adunay pipila ka mga lumulupyo nga nagpahayag sa ilang kasubo ug nagpasangil nga adunay “palakasan” o pagpabor sa pagpili sa mga benepisyaryo.
Importante nga masabtan sa publiko nga walay gahum ang mga opisyal sa barangay sa pagpili, pagdugang, pagtangtang, o pag-ilis sa mga ngalan sa mga benepisyaryo sa UPLIFT Assistance. Ang listahan sa mga benepisyaryo gikan sa mga nasudnong database ug mga ahensya sa gobyerno sumala sa mga giya ug sukdanan nga gitakda sa national government.
𝗚𝗥𝗢𝗨𝗣 𝟏 – 𝗠𝗚𝗔 𝗕𝗘𝗡𝗘𝗣𝗜𝗦𝗬𝗔𝗥𝗢 𝗦𝗔 𝟒𝗣𝘀 𝗨𝗚 𝗪𝗔𝗟𝗔𝗡𝗚 𝗚𝗨𝗧𝗢𝗠 𝗣𝗥𝗢𝗚𝗥𝗔𝗠:
Ang unang grupo sa mga makadawat sa ayuda mao ang mga kasamtangang benepisyaryo sa Pantawid Pamilyang Pilipino Program (4Ps) ug Walang Gutom Program.
Makadawat sila og usa ka higayon nga ayuda nga nagkantidad og ₱2,000. Ang ilang mga ngalan anaa na sa opisyal nga talaan sa Department of Social Welfare and Development (DSWD). Busa, ang DSWD maoy nagtino kung kinsa ang sakop niini nga grupo. Dili na sila pilion pag-usab sa barangay tungod kay rehistrado na sila ug kasamtangang benepisyaryo sa maong mga programa sa gobyerno.
𝗚𝗥𝗢𝗨𝗣 𝟐 – 𝗠𝗚𝗔 𝗞𝗔𝗕𝗨𝗦 𝗡𝗚𝗔 𝗣𝗔𝗠𝗜𝗟𝗬𝗔 𝗕𝗔𝗦𝗘 𝗦𝗔 𝟐𝟎𝟐𝟒 𝗖𝗕𝗠𝗦
Ang ikaduhang grupo gilangkuban sa mga kabalayan nga giklasipikar nga kabus base sa 2024 Community-Based Monitoring System (CBMS) nga gipahigayon sa Philippine Statistics Authority (PSA).
Ang CBMS usa ka halapad nga pagtipon sa datos mahitungod sa kahimtang sa matag pamilya, lakip ang ilang panginabuhian, kita, puy-anan, edukasyon ug uban pang impormasyon. Kini nga mga datos gisumite sa PSA ngadto sa mga may kalabutan nga ahensya sa gobyerno ug nahimong basihan sa DSWD sa pagtino sa mga kwalipikadong benepisyaryo.
Kung ang usa ka pamilya wala maapil sa listahan sa mga napiling benepisyaryo base sa CBMS, dili kini nagpasabot nga adunay nagtangtang sa ilang ngalan sa barangay. Ang basihan mao ang opisyal nga datos nga natigom atol sa pagpahigayon sa CBMS. Ang mga benepisyaryo niini nga grupo makadawat og ₱2,000 matag bulan sugod Hulyo hangtod Disyembre 2026.
𝗚𝗥𝗢𝗨𝗣 𝟑 – 𝗠𝗚𝗔 𝗨𝗕𝗢𝗦 𝗢𝗚 𝗞𝗜𝗧𝗔 𝗡𝗚𝗔 𝗠𝗚𝗔 𝗧𝗥𝗔𝗕𝗔𝗛𝗔𝗡𝗧𝗘 𝗡𝗚𝗔 𝗠𝗜𝗬𝗘𝗠𝗕𝗥𝗢 𝗦𝗔 𝗦𝗦𝗦
Ang ikatulong grupo gilangkuban sa kapin 1.5 milyon ka mga manggagawang adunay ubos nga kita nga rehistrado sa Social Security System (SSS). Kini nga listahan direkta gikan sa rekord sa SSS nga gitakda sa gobyerno.
Ang mga kwalipikadong mamumuo o trabahante makadawat og tag ₱2,000 matag bulan sugod Hulyo hangtod Disyembre 2026. Sa makausa pa, walay papel ang barangay sa pagpili sa mga benepisyaryo niini nga grupo.
𝗨𝗡𝗦𝗔 𝗟𝗔𝗠𝗔𝗡𝗚 𝗔𝗡𝗚 𝗣𝗔𝗣𝗘𝗟 𝗦𝗔 𝗕𝗔𝗥𝗔𝗡𝗚𝗔𝗬?
Ang tahas sa mga opisyales sa barangay nakasentro lamang sa pagtabang aron masiguro ang hapsay nga implementasyon sa programa.
Lakip niini ang:
• Pagpaskil o pagmantala sa opisyal nga listahan kung kini ipadala na sa DSWD o sa may kalabutan nga ahensya;
• Paghatag og impormasyon mahitungod sa iskedyul sa payout o pag-apod-apod sa ayuda;
• Pagmintinar sa kahapsay ug pagtabang aron hapsay ang dagan sa paghatag sa ayuda;
• Pagtubag sa mga pangutana sa mga residente ug paggiya kanila ngadto sa hustong opisina kon adunay gustong paberipikahon.
𝗞𝗔𝗕𝗔𝗛𝗜𝗡 𝗦𝗔 𝗜𝗟𝗔𝗡𝗚 𝗕𝗨𝗟𝗨𝗛𝗔𝗧𝗢𝗡
Dili sakop sa katungdanan sa mga opisyal sa barangay ang pagpili sa mga benepisyaryo o pagdesisyon kung kinsa ang maapil o dili maapil sa listahan sa mga makadawat sa ayuda.
𝗣𝗔𝗛𝗜𝗡𝗨𝗠𝗗𝗢𝗠 𝗦𝗔 𝗣𝗨𝗕𝗟𝗜𝗞𝗢
Kung adunay mga pangutana o gustong iklaro mahitungod sa kwalipikasyon alang sa UPLIFT Assistance Program, mas maayo nga moduol sa DSWD, City o Municipal Social Welfare and Development Office (MSWDO), o sa uban pang may kalabutan nga ahensya nga nagdumala sa programa.
Importante ang pagsabot sa tibuok proseso aron malikayan ang sayop nga impormasyon ug dili patas nga pagpasangil sa mga opisyal sa barangay nga nag-alagad lamang isip kaabag sa implementasyon sa programa ug dili sa pagpili sa mga makadawat sa ayuda.
