09/10/2026
*گرلز ڈگری کالج سکردو کی سینئر گرلز گائیڈ کی ٹیم کا کتپناہ جھیل پر فیلڈ ٹرپ*
------------------------------------------
گورنمنٹ گرلز ڈگری کالج سکردو کی سینئر گرلز گائیڈ کی طالبات نے چیئرپرسن گرلز گائیڈ ایسوسی ایشن، گرلز ڈگری کالج سکردو، لیکچرار مدیحہ رانی کی زیرِ نگرانی کتپناہ جھیل کا فیلڈ ٹرپ کیا۔ اس موقع پر میم ثمینہ اور میم سجیلہ بھی طالبات کے ہمراہ موجود تھیں۔
فیلڈ ٹرپ کے دوران طالبات نے کتپناہ جھیل کے اطراف صفائی مہم میں حصہ لیا اور وہاں موجود کچرے اور دیگر قابلِ تلف اشیاء کو جمع کرکے مناسب طریقے سے ٹھکانے لگایا۔ طالبات نے جھیل کے قریب کیمپ بھی قائم کیا، جہاں گرلز گائیڈ کی تربیتی سرگرمیوں کا عملی مظاہرہ کیا گیا۔
اس فیلڈ ٹرپ کا بنیادی مقصد طالبات میں باہمی تعاون، خود انحصاری، خدمتِ خلق اور ماحول دوست رویوں کو فروغ دینا تھا۔ اس دوران طالبات کو عملی طور پر یہ سکھایا گیا کہ گرلز گائیڈز کس طرح ایک دوسرے کی مدد کرتی ہیں، مشکل حالات میں باہمی تعاون کا مظاہرہ کرتی ہیں اور قدرتی ماحول کی حفاظت میں اپنا کردار ادا کرتی ہیں۔
اس موقع پر چیئرپرسن گرلز گائیڈ ایسوسی ایشن گرلز ڈگری کالج سکردو، لیکچرار مدیحہ رانی نے پرنسپل کالج ہٰذا پروفیسر ڈاکٹر عظمیٰ سلیم کا خصوصی شکریہ ادا کرتے ہوئے کہا کہ ان کی بھرپور سرپرستی اور حوصلہ افزائی کی بدولت طالبات کو نصابی سرگرمیوں کے ساتھ ساتھ عملی اور تربیتی سرگرمیوں میں حصہ لینے کے مواقع میسر آ رہے ہیں۔ انہوں نے کہا کہ اس نوعیت کی سرگرمیاں طالبات میں نظم و ضبط، قیادت، باہمی تعاون اور ماحول سے محبت کا جذبہ اجاگر کرنے میں اہم کردار ادا کرتی ہیں۔
انہوں نے امید ظاہر کی کہ گرلز گائیڈ کی طالبات آئندہ بھی معاشرے اور ماحول کی بہتری کے لیے اپنی خدمات جاری رکھیں گی۔
