21/10/2026
Stad Vekst skal koordinere ringverknadsarbeidet rundt Stad skipstunnel
Kystverket og Stad Vekst har inngått ein samarbeidsavtale om ringverknadene av Stad skipstunnel. Målet er at næringslivet og lokalsamfunna i regionen skal få mest mogleg ut av utbygginga, både i byggeperioden og etter at tunnelen er opna.
Stad Vekst skal koordinere arbeidet på tvers av kommunar, næringsorganisasjonar og bransjar. Dette skal vere eit breitt regionalt samarbeid. Vi ønskjer å få med næringsorganisasjonar og andre aktørar på begge sider av fylkesgrensa, slik at vi saman kan utnytte moglegheitene tunnelen gir.
Kystverket får med avtalen éin regional samarbeidspartnar som samlar og samordnar dei mange gode initiativa rundt prosjektet. Det gir ei tydeleg ansvarsdeling, og Kystverket kan konsentrere seg om hovudoppgåva: å byggje Stad skipstunnel.
Eitt av dei første tiltaka er å hjelpe lokale og regionale leverandørar i posisjon til oppdrag i byggefasen. Saman med AF Gruppen arbeider vi no med korleis næringslivet i regionen best kan få informasjon om behova og innkjøpsprosessane i prosjektet. Meir om dette kjem om kort tid. Følg med!
Har du spørsmål eller idear til ringverknadsarbeidet? Ta kontakt med prosjektleiar Lars Endre Gimmestad.
